|
|
by Suryaa Desk | Mon, Nov 25, 2024, 12:58 PM
హైదరాబాద్ బంజారాహిల్స్‌లో బెంజ్‌ కారు బీభత్సం సృష్టించింది. సోమవారం ఉదయం అతివేగంగా దూసుకొచ్చిన కారు బంజారాహిల్స్‌ సిటీ సెంటర్‌ షాపింగ్‌మాల్‌ వద్ద అదుపుతప్పి డివైడర్‌ను ఢీకొట్టింది. దీంతో కారు ముందు భాగం పూర్తిగా ధ్వంసమైంది. అయితే ఎయిర్‌ బ్యాగ్స్‌ తెరచుకోవడంతో కారును నడుపుతున్న మహిళ క్షేమంగా బయట పడ్డారు. అందులోనుంచి బయటకు రావడానికి ఇబ్బంది పడుతున్న ఆమెను వాహనదారులు రక్షించారు. అతికష్టంపై ఆమెను బయటకు తీసుకొచ్చారు. ఆమె మద్యం మత్తులో ఉన్నట్లుగా గుర్తించిన వారు.. పోలీసులకు సమాచారం అందిచారు.ఘటనా స్థలానికి చేరుకున్న పోలీసులు.. క్రేన్‌ సహాయంతో ప్రమాదానికి గురైన కారును అక్కడి నుంచి తరలించారు. మూల మలుపు వద్ద కారు వేగాన్ని నియంత్రించక పోవడంతో ప్రమాదం జరిగిందని చెప్పారు. డ్రైవర్‌ మద్యం మత్తులో ఉన్నట్లు చెప్పారు. ఈ ఘటనపై కేసు నమోదుచేసి దర్యాప్తు చేస్తున్నామన్నారు. అయితే ఆ కారు, మహిళా డ్రైవర్‌ వివరాలు తెలియాల్సి ఉన్నది.
