|
|
by Suryaa Desk | Fri, Nov 22, 2024, 09:29 PM
వీకెండ్ డేస్‌లో దగ్గర్లోని టూరిస్టు ప్లేసెస్‌కు వెళ్లాలని చాలా మంది ఫ్లాన్ చేసుకుంటారు. అలా ఫ్లాన్ చేసుకునే వారికి తెలంగాణ టూరిజం డిపార్ట్‌మెంట్ గుడ్‌న్యూస్ చెప్పింది. హైదరాబాద్ నగరానికి అతి దగ్గర్లోనే అండమాన్ దీవులకు వెళ్లిన ఫీల్ కలిగేలా ఓ కొత్త ఐలాండ్ను అందుబాటులోకి తీసుకొచ్చింది. ములుగు జిల్లాలో ప్రసిద్ధి చెందిన లక్నవరం లేక్‌లో మూడో ఐలాండ్ టూరిస్టులకు అందుబాటులోకి వచ్చింది. సుమారు రూ.7 కోట్ల వ్యయంతో 3 ఎకరాల విస్తీర్ణంలో ఈ ఐలాండ్ డెవలప్ చేశారు. తెలంగాణ టూరిజం డెవలప్మెంట్ కార్పొరేషన్, ఫ్రీ కోట్స్ సంస్థ సంయుక్తంగా ఈ ఐలాండ్ను నిర్మించాయి.
అండమాన్, మాల్దీవుల్లోని ఐలాండ్లు, సిమ్లా, మున్నార్‌ వంటి ప్రాంతాలను తలపించేలా ఈ ద్వీపాన్ని అద్భుతంగా సుందరీకరించారు. ఈ ఐలాండ్ను మంత్రులు జూపల్లి కృష్ణారావు, సీతక్క బుధవారం ప్రారంభించారు. హైదరాబాద్ నగరానికి 210 కి.మీ, వరంగల్ సిటీ నుంచి సుమారు 70 కిలోమీటర్ల దూరంలోని గోవిందరావుపేట మండలం బుస్సాపూర్ సమీపంలోని లక్నవరం లేక్ ఉంటుంది. దట్టమైన అడవుల మధ్య కొండల నడుమ ఈ సరస్సు ఏర్పడింది. లక్నవరం లేక్‌లో ఇప్పటికే రెండు ఐలాండ్స్ పర్యాటకులను ఆకట్టుకుంటుండగా.. తాజాగా మూడో ఐలాండ్ను అందుబాటులోకి తీసుకొచ్చారు.
ఇందులో మొత్తం 21 కాటేజీలుండగా, నాలుగింటిని కుటుంబసభ్యులతో బస చేసేందుకు వీలుగా అద్భుతంగా, ఆకర్షణీయంగా తీర్చిదిద్దారు. ఐదు స్విమ్మింగ్ ఫూల్స్‌లో.. నాలుగింటిని వ్యక్తిగత కాటేజీలను కనెక్ట్ చేస్తూ నిర్మించారు. ఇక్కడకు వచ్చే పిల్లల కోసం ప్రత్యేకమైన స్విమ్మింగ్ ఫూల్, ఆట వస్తువులను సైతం అందుబాటులో ఉంచారు. తాజాగా ప్రారంభించిన ఐలాండ్‌లో పెద్దల కోసం రెండు స్పాలు, రెస్టారెంటు తదితర సౌకర్యాలు సైతం కల్పించారు. ఫ్రీ కోట్స్‌కు చెందిన సుమారు 40 మంది సిబ్బంది ఈ కొత్త ఐలాండ్‌లో విధులు నిర్వర్తిస్తున్నారు.
లక్నవరం సరస్సు టూరిస్టుల స్వర్గధామమని మంత్రి జూపల్లి స్పష్టం చేశారు. ములుగు జిల్లాలో రామప్ప, లక్నవరం లాంటి సరస్సులు ఉండడంతో పాటు దేశంలోనే అతిపెద్ద గిరిజన జాతరగా పేరొందిన సమ్మక్క, సారలమ్మ జాతర మంచి గుర్తింపు తెచ్చి పెడుతున్నాయన్నారు. ప్రజలు నిత్యం బిజీ షెడ్యూల్లో గడపడమే కాకుండా పర్యాటక ప్రాంతాలలో పర్యటించి మానసిక ఉల్లాసాన్ని పొందాలని సూచించారు. పర్యాటక అభివృద్ధికి తెలంగాణ ప్రభుత్వం రూ.150 కోట్లు ఖర్చు చేస్తోందని ఆయన స్పష్టం చేశారు. లక్నవరంలో ఐదేళ్ల ఫ్రీ కోట్స్ సంస్థ ఆధ్వర్యంలో పర్యాటకులకు వసతులు కల్పిస్తామని అన్నారు.
