|
|
by Suryaa Desk | Sun, Nov 24, 2024, 07:08 PM
భద్రాద్రి కొత్తగూడెం జిల్లా ఇల్లందు మాజీ ఎమ్మెల్యే ఊకే అబ్బయ్య(70) కన్నుమూశారు. గత కొంతకాలంగా అనారోగ్య సమస్యలతో బాధపడుతున్న ఆయన.. హైదరాబాద్‌లోని ఓ ప్రైవేటు ఆసుపత్రిలో చికిత్స పొందుతూ ఇవాళ ఉదయం తుదిశ్వాస విడిచారు. అబ్బయ్య ఉమ్మడి ఏపీలో మూడు సార్లు ఎమ్మెల్యేగా పని చేశారు. బూర్గంపాడు, ఇల్లందు ఎమ్మెల్యేగా సేవలందించారు. ఆయన మృతిపట్ల పలువురు నేతలు సంతాపం వ్యక్తం చేస్తున్నారు.
ఊకే అబ్బయ్య సీపీఐ పార్టీ ద్వారా రాజకీయాల్లోకి వచ్చారు. తొలిసారిగా 1985లో బూర్గంపాడు నియోజకవర్గం నుండి ఎమ్మెల్యేగా విజయం సాధించారు. అనంతరం 1999లో ఇల్లందు నియోజకవర్గం నుండి రెండోసారి ఎమ్మెల్యేగా గెలిచారు. అనంతరం టీడీపీ తీర్థం పుచ్చుకున్నారు. 2009లో తెలుగుదేశం పార్టీ తరపున ఇల్లందు నుంచే పోటీ చేసి మూడోసారి ఎమ్మెల్యేగా ఎన్నికయ్యారు. తెలంగాణ ప్రత్యేక రాష్ట్రం ఏర్పాటు తర్వాత 2014 అసెంబ్లీ ఎన్నికల్లో టీడీపీ ఆయనకు టికెట్ నిరాకరించింది. దీంతో ఆయన తెలంగాణ రాష్ట్ర సమితి పార్టీలో చేరారు.
ఆ ఎన్నికల్లో టీఆర్ఎస్ అభ్యర్థిగా ఇల్లందు నియోజకవర్గం నుంచి పోటీ చేసి ఓడిపోయారు. 2018లో జరిగిన అసెంబ్లీ ఎన్నికల ముందు కాంగ్రెస్ పార్టీలో చేరారు. అయినా కాంగ్రెస్ పార్టీ టికెట్ నిరాకరించటంతో ఇల్లందు నుంచి ఇండిపెండెంట్‌గా పోటీ చేసి ఓటమి పాలయ్యారు. ఆ తర్వాత ఆయన కొంత కాలంగా యాక్టివ్ పాలిటిక్స్‌కు దూరంగా ఉంటున్నారు. అనంతరం అనారోగ్యం బారిన పడిన ఆయన ఆసుపత్రిలో చికిత్స పొందుతూ ప్రాణాలు కోల్పోయారు.
సీఎం రేవంత్ సంతాపం..
అబ్బయ్య మృతి పట్ల సీఎం రేవంత్ రెడ్డి సంతాపం వ్యక్తం చేశారు. ఆయన కుటుంబ సభ్యులకు ప్రగాఢ సానుభూతిని తెలియజేస్తూ ట్వీట్ చేసారు. 'గిరిజన నాయకులు, శాసనసభ మాజీ సభ్యులు ఊకే అబ్బయ్య గారి మృతి బాధాకరం. అబ్బయ్య గారి ఆత్మకు శాంతి చేకూరాలని ప్రార్ధిస్తూ.. శోకతప్తులైన వారి కుటుంబ సభ్యులకు ప్రగాఢ సానుభూతి తెలియజేస్తున్నా. భద్రాద్రి కొత్తగూడెం జిల్లాకు చెందిన ఊకే అబ్బయ్య ఉమ్మడి రాష్ట్రంలో బూర్గంపాడు నియోజకవర్గం నుంచి ఒకసారి, ఇల్లందు నియోజకవర్గం నుంచి రెండుసార్లు ఎమ్మెల్యేగా ప్రజలకు అమూల్యమైన సేవలందించారు.' అని సీఎం రేవంత్ రెడ్డి గుర్తు చేసుకున్నారు.
