|
|
by Suryaa Desk | Sat, Nov 23, 2024, 07:39 PM
అమృత్‌ భారత్‌ స్టేషన్ పథకం కింద తెలంగాణలోని పలు రైల్వే స్టేషన్లను కేంద్రం అభివృద్ది చేస్తోన్న సంగతి తెలిసిందే. చర్లపల్లి, సికింద్రాబాద్ స్టేషన్లతో పాటుగా మరో ఆరు స్టేషన్లకు కొత్త రూపును తీసుకొస్తున్నారు. ఈ స్టేషన్లలో అభివృద్ధి పనులకు సంబంధించి సౌత్ సెంట్రల్ రైల్వే రూ.170.61 కోట్ల నిధులు మంజూరు చేసింది. అందులో బేగంపేట, మల్కాజిగిరి స్టేషన్లలో దాదాపు 60 శాతం పనులు పూర్తయినట్లు సౌత్ సెంట్రల్ రైల్వే అధికారులు వెల్లడించారు. బేగంపేట స్టేషన్‌లో 65.. మల్కాజిగిరిలో 50 శాతం పనులు పూర్తయినట్లు చెప్పారు. మరో మూడు నెలల్లో ప్రయాణికులకు ఈ స్టేషన్లు అందుబాటులోకి వస్తాయని అంటున్నారు.
బేగంపేట రైల్వే స్టేషన్‌లో ప్రస్తుతం 65 శాతం పనులు పూర్తయ్యాయి. ప్లాట్‌ఫామ్‌లపై ప్రయాణికులకు నీడ ఉండేలా రేకుల నిర్మాణం ఓ వైపు పూర్తయింది. మరోవైపు నిర్మాణానికి పనులు జరుగుతున్నారు. ఎంట్రీ, ఎగ్జిట్ మార్గాలను అధునాతన హంగులతో తీర్చిదిద్దుతున్నారు. కొన్ని ఎక్స్‌ప్రెస్‌ ట్రైన్లు ఇక్కడ హాల్టింగ్‌ ఉండటంతో ప్రయాణికుల వేచి ఉండే గదులను అత్యాధునికంగా సకల హంగులతో పూర్తిగా ఆధునికీకరిస్తున్నారు. ఇక మల్కాజిగిరి రైల్వే స్టేషన్‌లో ప్లాట్‌ఫామ్‌-1, 2 వైపు షెల్టర్ల పనులు ప్రస్తుతం కొనసాగుతున్నాయి. ప్లాట్‌ఫామ్‌-1 పై వీఐపీ లాంజ్, వాష్ రూములు, బాత్‌రూమ్‌ నిర్మాణం పురోగతిలో ఉందని రైల్వే అధికారులు తెలిపారు.
ప్లాట్‌ఫామ్‌-2 పక్కన సైడ్‌వాల్‌ పనులు, అప్రోచ్‌రోడ్ల నిర్మాణం పూర్తయినట్లు అధికారులు తెలిపారు. 12 మీటర్ల వెడల్పైన ఫుట్‌ఓవర్‌ బ్రిడ్జి పిల్లర్లపై గిర్డర్లను ఏర్పాటు చేయగా.. మరో నెల రోజుల్లో ఈ బ్రిడ్జి పనులు పూర్తి కానున్నట్లు వెల్లడించారు. వాటికి తుదిమెరుగులు దిద్దుకొని ఆధునికీకరించిన స్టేషన్ అందుబాటులోకి వచ్చేందుకు మరో 6 నెలలు పట్టే ఛాన్స్ ఉందని చెప్పారు. హఫీజ్పేట్ రైల్వే స్టేషన్ నిర్మాణ పనులు రూ.26.60 కోట్లతో చేపట్టారు. ప్రస్తుతం పనుల్లో వేగం మందగించిందని అధికారులు తెలిపారు. ఇప్పటి వరకు 55శాతం పనులు పూర్తయినట్టు స్టేషన్ సిబ్బంది వెల్లడించారు. మెయిన్ ఎంట్రెన్స్ ఆధునికీకరణ, పార్కింగ్‌ సదుపాయాల కల్పన, ల్యాండ్‌ స్కేపింగ్‌ పనులు స్పీడ్‌గా జరుగతున్నాయన్నారు.
ఉప్పుగూడ, హఫీజ్పేట్, మలక్‌పేట, యాకుత్‌పుర, హైటెక్‌సిటీ స్టేషన్లలో నిర్మాణ పనుల్లో వేగం పుంజుకోవాల్సి ఉందని సౌత్ సెంట్రల్ రైల్వే అధికారులు తెలిపారు. మలక్‌పేటలో 1 5శాతం పనులు పూర్తి కాగా.. యాకుత్‌పురలో ఇటీవలే పనులు మొదలుపెట్టారు. ఉప్పుగూడలోనూ అదే పరిస్థితి ఉందని చెప్పారు. ఇక చర్లపల్లి రైల్వే టెర్మినల్ అభివృద్ధి పనులు శరవేగంగా కొనసాగుతుండగా.. త్వరలోనే మోదీ ఈ స్టేషన్‌ను ప్రారంభిస్తారని అధికారులు తెలిపారు.
