|
|
by Suryaa Desk | Mon, Jan 20, 2025, 07:04 PM
పౌరహక్కుల నేత ప్రొఫెసర్ హరగోపాల్‌ను పోలీసులు అరెస్ట్ చేశారు. నాగర్‌కర్నూల్ జిల్లా బల్మూర్ మండలం మైలారం గ్రామంలో జరుగుతున్న మైనింగ్‌కు వ్యతిరేకంగా గతకొంతకాలంగా గ్రామస్థులు చేస్తున్న ఉద్యమానికి ప్రొఫెసర్ హరగోపాల్ మద్దతు ప్రకటించారు. పలు సంఘాల నాయకులతో వెళ్లిన హరగోపాల్‌ను పోలీసులు అరెస్ట్ చేశారు. ఈ సందర్భంగా.. హరగోపాల్ అరెస్టును స్థానికులే కాకుండా విపక్షాలు తీవ్రంగా ఖండిస్తున్నాయి. ఇన్నాళ్లు ప్రభుత్వానికి, ప్రజలకు, ప్రతిపక్షాలకు వారధిలా ఉన్న ప్రొఫెసర్ హరగోపాల్ వంటి వ్యక్తులను అరెస్ట్ చేయడాన్ని చాలా మంది ఖండిస్తున్నారు.
అరెస్టుకు ముందు మాట్లాడిన హరగోపాల్.. రాష్ట్ర ప్రభుత్వంపై అసహనం వ్యక్తం చేశారు. సర్కార్ మొండి వైఖరి వదులుకొని ప్రజల మనోభావాలు దెబ్బతినకుండా చూసుకోవాలని సూచించారు. ప్రజలు ఆహ్వానించే పరిశ్రమలు తీసుకురావాలి కానీ ప్రజలు వ్యతిరేకించే పని అభివృద్ధి కాదని హరగోపాల్ తెలిపారు. మైలారం గుట్టల్లో విలువైన ఖనిజాల కోసం కాంట్రాక్టర్లకు ప్రభుత్వం అనుమతివ్వడం సరైంది కాదని అభిప్రాయపడ్డారు. ప్రభుత్వం మైనింగ్‌కు అనుమతులు ఇవ్వటాన్ని స్థానిక ప్రజలు మొదటి నుంచి వ్యతిరేకిస్తున్నారని చెప్పుకొచ్చారు.
గుట్టల విధ్వంసంతో స్థానిక ప్రజలు ఉపాధి కోల్పోవడంతో పాటు పర్యావరణ సమస్యలు ఏర్పడుతాయని హరగోపాల్ వివరించారు. ప్రజలు వద్దనుకున్న అభివృద్ధిని ప్రభుత్వం చేపట్టడం అప్రజాస్వామికమని చెప్పుకొచ్చారు. కాంగ్రెస్ ప్రభుత్వం తక్షణమే అనుమతులు రద్దు చేసి మైనింగ్ అంశంపై పునఃసమీక్ష చేయాలని హరగోపాల్ డిమాండ్ చేశారు.
ప్రొఫెసర్ హరగోపాల్ అరెస్టుతో మైలారం గ్రామంలో ఉద్రిక్తత పరిస్థితులు నెలకొన్నాయి. మైనింగ్‌కు వ్యతిరేకంగా ఆందోళన నిర్వహిస్తున్న గ్రామస్థులు.. పోలీసులను ఊరిలోకి రానీయకుండా రోడ్డుపై ముళ్ల కంపలు వేసి అడ్డుకున్నారు. ఈ క్రమంలోనే.. పోలీసులకు, గ్రామస్థులకు మధ్య వాగ్వాదం చోటు చేసుకోగా.. తోపులాటలో ఓ మహిళ సృహతప్పి పడిపోయింది.
హరగోపాల్‌ను అరెస్టు చేయడం అమానుషమని.. తీవ్రంగా ఖండిస్తున్నామని మాజీ మంత్రి హరీశ్రావు తెలిపారు. ప్రజా పాలన, ప్రజాస్వామ్య పునరుద్దరణ అంటూ గప్పాలు కొట్టి, ఇప్పుడు ప్రజల తర‌పున పోరాటం చేస్తున్న ప్రజా సంఘాల నాయకుల గొంతులు నొక్కడం అమానుషమన్నారు. "సీఎం రేవంత్ రెడ్డి.. ఇదేనా మీరు చెప్పిన సోకాల్డ్ ప్రజాపాలన" అంటూ హరీశ్రావు నిల‌దీశారు. ఇందిరమ్మ రాజ్యమని చెప్పిన మీరు కంచెలు, ఆంక్షలు, అరెస్టులతో నాటి ఎమర్జెన్సీ పాలనను గుర్తు చేస్తున్నారని విమర్శించారు. ప్రొఫెసర్ హరగోపాల్ సహా అరెస్టు చేసిన ప్రజా సంఘాల నాయకులను వెంటనే విడుదల చేయాలని హరీష్ రావు డిమాండ్ చేశారు.
