![]() |
![]() |
by Suryaa Desk | Fri, Jun 28, 2024, 07:55 PM
ఇటీవల తెలంగాణ వ్యాప్తంగా ఫుడ్ సెఫ్టీ అధికారులు తనిఖీలు ముమ్మరం చేసిన సంగతి తెలిసిందే. ఈ తనిఖీల్లో పలు హోటళ్లు, రెస్టారెంట్లలో పాడైన ఆహారం, కుళ్లిన మాంసంతోపాటు, కిచెన్లో అపరిశుభ్ర వాతావరణం ఉన్నట్లు వెలుగులోకి వచ్చింది. దీంతో నిబంధనలను పాటించని హోటళ్లు, రెస్టారెంట్ల యాజమాన్యాలపై అధికారులు కొరడా ఝులిపిస్తున్నారు. ఫుడ్ సెఫ్టీ అధికారుల దాడులకు సంబంధించిన ఫొటోలు, వీడియోలు సోషల్ మీడియాలో వైరల్ కావడంతో.. బయట తినేందుకు జనం జంకుతున్నారు.
కాగా హైదరాబాద్ నగరంలోనే అతిపెద్ద మాల్స్లో ఒకటైన లులు మాల్స్లోనూ పరిస్థితులు అంత గొప్పగా ఏమీ లేవని ఫుడ్ సెఫ్టీ అధికారుల తనిఖీల్లో తేలింది. కూకట్పల్లిలో ఉన్న లులు మాల్లో ఫుడ్ సెఫ్టీ టాస్క్ఫోర్స్ అధికారులు ఇటీవల తనిఖీలు చేపట్టారు. ఈ సందర్భంగా మాల్లో ఉన్న బేకరీలో కాలం చెల్లిన ఆహార పదార్థాలు ఉన్నట్టు గుర్తించారు. మాల్లో ఉన్న బ్రెడ్ మిక్స్కు బూజు పట్టి ఉండటాన్ని అధికారులు గుర్తించారు.
లులు మాల్లో గడువు ముగిసిన 20 లీటర్ల టోన్డ్ మిల్క్ పాల ప్యాకెట్లు ఉన్నాయని తనిఖీల్లో తేలింది. వీటితోపాటు బిస్కెట్ ప్యాకెట్లు, పండ్ల రసాలు (2 కిలోలు), జెమ్స్ (5 కిలోలు), నవ్వులు (20 కిలోలు) మొదలైనవి కూడా ఎక్స్పయిరీ డేట్ దాటినప్పటికీ.. మాల్లో ఉన్నట్లు అధికారులు గుర్తించారు. దీంతో వాటిని బయటపడేశారు. నిబంధనల ప్రకారం ఫుడ్ సెఫ్టీ అథారిటీ ఆఫ్ ఇండియా (FSSAI) లైసెన్స్ను ఎంట్రీ గేట్ దగ్గర అందరికీ కనిపించేలా ఉంచాలి. కానీ లులు మాల్లో అలా ఉంచకపోవడంతో అధికారులు నోటీసులు ఇచ్చారు.
అయితే లులు మాల్ ఫుడ్ సెక్షన్లో పని చేసే వర్కర్లు హెయిర్ క్యాప్స్, గ్లోవ్స్, మాస్కులు, యూనిఫామ్ ధరించి పరిశుభ్రత ప్రమాణాలను పాటిస్తున్నట్లు అధికారులు తెలిపారు. మాంసాన్ని నిల్వ చేసే ప్రదేశానికి చేరువగా ఈగలు ఉన్నట్లు అధికారుల పరిశీలనలో తేలింది. దీంతో లులు మాల్కు నోటీసులు జారీ చేసి, తగిన చర్యలు తీసుకుంటామని ఫుడ్ సెఫ్టీ విభాగం అధికారులు తెలిపారు.
2023 సెపెంబర్లో ప్రారంభం..
హైదరాబాద్లో లులు మాల్ను 2023 సెపెంబర్లో ప్రారంభించారు. నాటి ఐటీ శాఖ మంత్రి కేటీఆర్ చేతుల మీదుగా ఈ మాల్ను ప్రారంభించారు. 5 లక్షల చదరపు అడుగుల విస్తీర్ణంలో ఈ మాల్ ఉండగా.. అందులో హైపర్ మార్కెట్ ఒక్కటే 2 లక్షల చదరపు అడుగుల విస్తీర్ణంలో ఉంటుంది. ఇందులో ఫుడ్ కోర్టుతోపాటు ఏడు రెస్టారెంట్లు కూడా ఉన్నాయి. గతంలో ఉన్న మంజీరా మాల్ను లులు గ్రూప్ తీసుకొని లులు మాల్గా మార్చేసింది.