|
|
by Suryaa Desk | Sat, Jun 29, 2024, 08:42 PM
వందలాది ప్రభుత్వ, ప్రయివేట్ సేవలను అందిస్తోన్న మీ సేవ కేంద్రాలను ప్రతి గ్రామంలోనూ ఏర్పాటు చేయాలని తెలంగాణ ప్రభుత్వం నిర్ణయించింది. మహిళా శక్తి పథకం కింద స్వయం సహాయక సంఘాల సభ్యులకు వీటిని మంజూరు చేయనుంది. మీ సేవా కేంద్రాల ఏర్పాటుకు ఆసక్తిచూపే డ్వాక్రా సంఘాలను ఎంపిక చేయాలని అన్ని జిల్లాల కలెక్టర్లను రేవంత్ రెడ్డి సర్కారు ఆదేశించింది. ఆగస్టు 15 నాటికి వీటిని అందుబాటులోకి తీసుకురావాలని ప్రభుత్వం యోచిస్తోంది. ప్రస్తుతం రాష్ట్రవ్యాప్తంగా మొత్తం 4,525 మీ సేవ కేంద్రాలు ఉండగా.. వీటిలో 3 వేల వరకు నగర, పట్టణ ప్రాంతాల్లోనే ఉన్నాయి.
తెలంగాణలో మొత్తం 12,769 గ్రామ పంచాయతీలుండగా.. 1,500 వరకే మాత్రమే గ్రామాల్లో అందుబాటులో ఉన్నాయి. పలు ధ్రువీకరణపత్రాలతోపాటు ఆధార్‌ సేవలు, దరఖాస్తులు, చెల్లింపులు సహా 150కి పైగా ప్రభుత్వ సేవలు, 600కు పైగా ప్రైవేటు సేవల కోసం గ్రామీణ ప్రాంతాలకు చెందిన ప్రజలు పట్టణాలు, నగరాల్లోని మీసేవా కేంద్రాల వద్దకు వెళ్లాల్సి వస్తోంది. ఈ నేపథ్యంలో మహిళాశక్తి పథకం కింద మీసేవ కేంద్రాలను అందుబాటులోకి తేవాలని ప్రభుత్వం నిర్ణయించింది. వీటిని విలేజ్‌ ఆర్గనైజేషన్‌పేరిట మహిళా శక్తి మీసేవ కేంద్రాలను రాష్ట్ర ప్రభుత్వం మంజూరు చేస్తుంది.
స్త్రీనిధి ద్వారా మీ సేవా కేంద్రం ఏర్పాటుకు రూ.2.50 లక్షల రుణాన్ని పంచాయతీరాజ్, గ్రామీణాభివృద్ధి శాఖ మంజూరు చేస్తుంది. వీటితో పాటు ప్రభుత్వ అధికారుల పర్యవేక్షణలో గుర్తింపు పొందిన సంస్థల నుంచి కంప్యూటర్లు, ప్రింటర్లు, జీపీఎస్, బయోమెట్రిక్‌ సామాగ్రి, కెమెరా, ఇంటర్నెట్‌ కనెక్షన్‌ కొనుగోలు చేయాల్సి ఉంటుంది. మీసేవా కేంద్రాలను ప్రారంభించిన తర్వాత ఆయా సంఘాలు రుణాన్ని నెలనెలా తిరిగి చెల్లించాలి.
స్థానికంగా ఉన్న గ్రామ పంచాయతీ, ప్రభుత్వ స్కూల్స్, రైతు వేదిక, అంగన్వాడీ లేదా ఇతర ప్రభుత్వ భవనాలు వాటి ప్రాంగణాల్లో మీసేవ కేంద్రానికి 10 అడుగుల పొడవు, పది అడుగుల వెడల్పుతో వసతి కల్పిస్తారు. డ్వాక్రా సంఘాల్లో ఇంటర్ ఉత్తీర్ణులైన మహిళలను మీ సేవ ఆపరేటర్లుగా ఎంపిక చేస్తారు. కేంద్రం నిర్వహణ, సేవలపై వారికి శిక్షణ ఇస్తారు. అనంతరం ఆయా సంఘాలతో మీసేవ సంస్థ అవగాహన ఒప్పందం కుదుర్చుకోనుంది. ఈ కేంద్రాల్లో ప్రభుత్వం నిర్దేశించిన ధరల మేరకు పారదర్శకంగా సేవలను అందిస్తారు. మీ-సేవ అధికారులు ఎప్పటికప్పుడు గ్రామీణ ప్రాంతాల్లోని కేంద్రాలను పరిశీలించి వాటి నిర్వహణకు పర్యవేక్షిస్తారు. ఆపరేటర్ల ఎంపిక అనంతరం వారికి నెల రోజులపాటు శిక్షణ ఇవ్వనున్నారు. మౌలిక వసతులు కల్పించిన అనంతరం ఆగస్టు 15 నాటికి మీ-సేవా కేంద్రాలను ప్రారంభించాలని ప్రభుత్వం భావిస్తోంది.
