|
|
by Suryaa Desk | Mon, Jul 01, 2024, 08:31 PM
హైదరాబాద్-విజయవాడ జాతీయ రహదారిపై టోల్ ఫీజు వసూళ్ల కాంట్రాక్ట్ నుంచి జీఎమ్మార్ సంస్థ వైదొలగింది. మరో ఏడాది పాటు వసూళ్లకు అవకాశం ఉన్నా.. ముందుగానే బాధ్యతల నుంచి తప్పుకోవడం గమనార్హం. దీంతో జులై 1 అర్ధరాత్రి నుంచి టోల్ వసూళ్లు నేషనల్ హైవేస్ అథారిటీ ఆఫ్ ఇండియా (ఎన్‌హెచ్‌ఏఐ) ఆధ్వర్యంలో ప్రారంభమయ్యాయి. కాంగ్రెస్ నేతృత్వంలోని యూపీఏ ప్రభుత్వ హయాంలో రెండు వరుసలుగా విజయవాడ హైవేను నాలుగు వరుసలుగా విస్తరించేందుకు పనులు చేపట్టారు. ఇందుకు సంబంధించిన రూ.1740 కోట్ల కాంట్రాక్ట్‌ను 2009లో జీఎమ్మార్ సంస్థ దక్కించుకుంది.
యాదాద్రి భువనగిరి జిల్లా చౌటుప్పల్‌ మండలం దండుమల్కాపురం నుంచి ఆంధ్రప్రదేశ్‌లోని కృష్ణా జిల్లా నందిగామ వరకు 181.5 కి.మీ. పొడవునా నాలుగు వరుసలుగా జాతీయ రహదారిని నిర్మించింది. దీనిపై మూడు చోట్ల తెలంగాణలోని పంతంగి, కొర్లపహాడ్.. ఏపీలోని చిల్లకల్లు వద్ద టోల్‌ప్లాజాలను ఏర్పాటుచేసింది. డిసెంబరు 2012 నుంచి టోల్ ఫీజు వసూళ్ల బాధ్యత, హైవే నిర్వహణను కూడా జీఎమ్మార్ సంస్థకే అప్పగించారు. కానీ, ఉమ్మడి ఆంధ్రప్రదేశ్ విభజనతో ఆదాయం తగ్గిపోయింది.
ఇసుక లారీలు, రవాణా వాహనాల రాకపోకలు గణనీయంగా తగ్గిపోవడంతో నష్టాలు వచ్చాయి. దీనిపై కోర్టును ఆశ్రయించిన జీఎమ్మార్.. తమకు పరిహారం చెల్లించాలని ఎన్‌హెచ్ఏఐను కోరింది. రోజుకు రూ.20 లక్షల మేర..నెలకు రూ.6 కోట్ల వరకు నష్టం వస్తుందని పేర్కొంది. దీంతో ఆ నష్టాన్ని రెండు విడతల్లో భర్తీ చేసేందుకు జీఎమ్మార్‌తో గతేడాది జూన్‌లో ఒప్పందం చేసుకొంది. 2025 జూన్‌ వరకు టోల్ వసూళ్లు చేసుకోవడానికి అవకాశం కల్పించింది.
కానీ, ఎన్‌హెచ్‌ఏఐతో ఒప్పందం మేరకు ఏడాది ముందే ఈ బాధ్యతల నుంచి ఆ సంస్థ తప్పుకొంది. ఈ నేపథ్యంలో టోల్ ఫీజు వసూళ్ల బాధ్యతలను ఎన్‌హెచ్‌ఏఐ చేపట్టింది. మూడు నెలల పాటు పంతంగి, కొర్లపహాడ్ వద్ద స్కైలాబ్‌ ఇన్‌ఫ్రాకు.. చిల్లకల్లు వద్ద కోరల్‌ ఇన్‌ఫ్రాలకు టోల్ వసూళ్ల బాధ్యతలను అప్పగించింది. ఇక, హైదరాబాద్- విజయవాడ జాతీయ రహదారి ఆరు వరుసలుగా విస్తరించనున్నారు. ఇందుకు సంబంధించిన టెండర్ ప్రక్రియ సెప్టెంబరులో ప్రారంభించే అవకాశం ఉందని రాష్ట్ర రోడ్లు భవనాల శాఖ మంత్రి కోమటిరెడ్డి వెంకట్‌రెడ్డి ఇటీవల ప్రకటించారు.
