![]() |
![]() |
by Suryaa Desk | Sat, Jun 29, 2024, 08:36 PM
హైదరాబాద్లో ఓ వ్యక్తి ట్రాఫిక్ పోలీసులకు ఝలక్ ఇచ్చాడు. డ్రంక్ అండ్ డ్రైవ్లో బ్రీత్ ఎనలైజర్ ఊదరా బాబూ అంటే పోలీసులకు రివర్స్లో ఊహించని ట్విస్ట్ ఇచ్చాడు. ఈ నెల 27న అర్ధరాత్రి దాటాక ట్రాఫిక్ పోలీసులు.. నగరంలోని పుల్లారెడ్డి బంగ్లా దాటిన తర్వాత వచ్చే ట్రాఫిక్ పాయింట్ చౌరస్తాలో డ్రంక్ అండ్ డ్రైవ్ నిర్వహించారు. అదే సమయంలో వర్షం పడుతోంది.. అదే సమయంలో ఓ కారు అటువైపుగా వచ్చింది. ఆ డ్రైవర్కు పరీక్షలు చేయగా.. ఆయన మద్యం తాగలేదని తేలింది. ఆ తర్వాత వెనుకాలే మరో కారు అక్కడికి రాగా.. పోలీసులు ఆపారు.
ఆ కారును కానిస్టేబుల్ మహేందర్ బ్యారికేడ్లకు అవతలి వైపు తీసుకెళ్లారు. కారు డ్రైవింగ్ సీటులో ఉన్న వ్యక్తిని పరీక్షించేందుకు బ్రీత్ ఎనలైజర్ బయటకు తీశారు.. ఊదమని అతడికి చెప్పగా.. అతడు ఊదినట్లే నటించాడు. అందరికీ ట్విస్ట్ ఇస్తూ.. కానిస్టేబుల్ చేతిలో ఉన్న బ్రీత్ ఎనలైజర్ను లాక్కుని కారుతో సహా అక్కడి నుంచి ఉడాయించాడు ఆ వ్యక్తి. వెంటనే అప్రమత్తమైన ట్రాఫిక్ పోలీసులు కారును వెంబడించినా దొరకలేదు. అర్థరాత్రి కావడం, పెద్దగా ట్రాఫిక్ లేకపోవడంతో పాటుగా వర్షం కురుస్తుండడంతో ఆ కారును పట్టుకోలేకపోయారు. కారును డ్రైవర్ అతి వేగంగా తీసుకెళ్లడంతో నంబరును గుర్తించలేకపోయామంటున్నారు పోలీసులు.