|
|
by Suryaa Desk | Wed, Nov 06, 2024, 08:15 PM
తెలుగు రాష్ట్రాల్లో ఇటీవల భారీ వర్షాలు కురిశాయి. ఈసారి ఆగస్టు నెలలో మినహా.. మిగిలిన అన్ని మాసాల్లోనూ ఆశించిన దానికంటే అధికంగానే వర్షాలు కురిశాయి. దీంతో ఈ ఏడాది అధిక వర్షపాతం నమోదైనట్లు వాతావరణ శాఖ అధికారులు తెలిపారు. అక్టోబర్ నెలలోనూ బంగాఖాతంలో మూడు అల్పపీడనాలు ఏర్పడి తెలుగు రాష్ట్రాల్లో విస్తారంగా వర్షాలు కురిశాయి. ఈ నేపథ్యంలో తెలంగాణలో వర్షాలపై హైదరాబాద్ వాతావరణ కేంద్రం అధికారులు కీలక అప్డేట్ ఇచ్చారు. రాష్ట్రంలో నేడు భారీ వర్షాలకు ఛాన్స్ లేదని చెప్పారు. పలు చోట్ల తేలికపాటి జల్లులు కురిసే అవకాశం మాత్రం ఉందన్నారు. ఈ మేరకు ఎటువంటి హెచ్చరికలు జారీ చేయలేదు.
అయితే నైరుతి బంగాళాఖాతంలో నేడు సాయంత్రం కానీ.. రేపు (నవంబర్ 7) కానీ మరో అల్పపీడనం ఏర్పడబోతున్నట్లు భారత వాతావరణ శాఖ హెచ్చరించింది. దీని ప్రభావంతో తెలంగాణ, ఏపీ సహా తమిళనాడు, కర్ణాటక రాష్ట్రాల్లో భారీ వర్షాలు కురిసే ఛాన్స్ ఉందని చెప్పారు. అల్పపీడన ప్రభావంతో నవంబర్ 7 నుంచి 11 వరకు మోస్తరు నుంచి భారీ వర్షాలు కురిసే అవకాశం ఉన్నట్లు పేర్కొన్నారు. తెలుగు రాష్ట్రాల్లో ఈనెలలో సాధారణం కంటే ఎక్కువ వర్షపాతం నమోదయ్యే అవకాశం ఉందని వెల్లడించారు. నేటి నుంచి రాష్ట్రంలో ఉష్ణోగ్రతలు తగ్గుముఖం పడతాయని అంచనా వేస్తున్నారు.
కాగా, గత నెలలో బంగాళాఖాతంలో 3 అల్పపీడనాలు ఏర్పడ్డాయి. దీంతో తెలుగు రాష్ట్రాల్లో విస్తారంగా వర్షాలు కురిశాయి. ఈ క్రమంలో రాష్ట్రానికి మరో అల్పపీడనం ముప్పు పొంచి ఉందని వాతావరణ శాఖ హెచ్చరికలు జారీ చేసింది. దీంతో ఆయా తీర ప్రాంతాల అధికారులు అప్రమత్తమయ్యారు. వచ్చే 48 గంటలు మత్స్యకారులు వేటకు వెళ్లొద్దని అమరావతి వాతావరణ కేంద్రం అధికారులు సూచించారు. ఇక నవంబర్ రెండో వారంలోనూ బంగాళాఖాతంలో మరో అల్పపీడనం ఏర్పడేందుకు అనుకూల వాతావరణం ఉందన్నారు. దీని ప్రభావంతో ఏపీలోని దక్షిణ కోస్తా, రాయలసీమలతో పాటుగా తెలంగాణలో భారీ వర్షాలు కురుస్తాయని హెచ్చరించారు.
ఇక తెలంగాణలో ప్రస్తుతం మిశ్రమ వాతావరణం ఉంటుంది. పగటి ఉష్ణోగ్రతలు 33 డిగ్రీల వరకు ఉంటుండగా.. రాత్రి, తెల్లవారుజామున ఉష్ణోగ్రతలు పడిపోతున్నాయి. హైదరాబాద్ నగరంలోని కొన్ని ప్రాంతాల్లో 18 డిగ్రీల కనిష్టానికి ఉష్ణోగ్రతలు పడిపోతున్నాయి. చలి తీవ్రత పెరగటంతో నగరవాసులు ఇబ్బందులు పడుతున్నారు.
