|
|
by Suryaa Desk | Fri, Jan 24, 2025, 07:15 PM
సంగారెడ్డి జిల్లా నారాయణఖేడ్ మండలం వెంకటాపూర్ గ్రామంలోని అంగన్వాడీ సెంటర్‌లో ప్రమాదం జరిగింది. చిన్న చిన్న పిల్లలు.. అప్పుడప్పుడే అమ్మ, ఆవు అంటూ చిలకపలుకులతో ముద్దుముద్దుగా మాట్లాడే బుజ్జాయిలు.. చిట్టి చిట్టి చేతులతో బలపం పలకపై అక్షరాలు దిద్దే పిల్లలు.. ఇంట్లో ఉంటే అల్లారి చేస్తారనో.. స్కూళ్లకు వెళ్లేందుకు అలవాటు పడతారనో.. పౌష్టికాహారం ఇస్తామని టీచర్ చెప్పిందనో.. మొత్తానికి చాలా మంది తల్లిదండ్రులు తమ పిల్లలను అంగన్వాడీ సెంటర్లకు పంపిస్తున్నారు. రెండు గంటలో మూడు గంటలో అక్కడ మిగతా చిన్నారులతో ఆడుకుని టీచర్ చెప్పే ముచ్చట్లు విని.. పలకపై పెట్టించిన అక్షరాలు దిద్దుకుని.. మళ్లీ ఇంటికి వచ్చేస్తుంటారు. అలాంటి చిన్నారులకు కేటాయించిన అంగన్వాడీ భవనాలు.. ఎంత అధ్వానంగా ఉంటున్నాయన్న దానికి ఈ ఘటనే ప్రత్యక్ష నిదర్శనం.
ముద్దులొలికే చిన్నారులు ఉండగానే అంగన్వాడీ భవనం పైకప్పు ఒక్కసారిగా పెచ్చులూడి పిల్లలపై పడిపోయింది. ఈ ఘటనలో పలువురు చిన్నారుల తలలకు గాయాలయ్యాయి. ఈ దురదృష్టమైన ఘటన.. సంగారెడ్డి జిల్లా నారాయణఖేడ్ మండలం వెంకటాపూర్ గ్రామంలో శుక్రవారం (జనవరి 24న) జరిగింది. ఈ ప్రమాదంలో గాయపడిన చిన్నారులను హుటాహుటిన నారాయణఖేడ్ ఏరియా ఆసుపత్రికి తరలించారు. ప్రస్తుతం ఆ చిన్నారులు చికిత్స పొందుతున్నారు. అయితే.. చిన్నారులకు చిన్న చిన్న గాయాలయ్యాయని.. ఎవరికీ ఎలాంటి ప్రమాదం లేదని వైద్యులు తెలిపారు.
ఈ ఘటనపై జిల్లా కలెక్టర్ వల్లూరు క్రాంతి వెంటనే స్పందించారు. హుటాహుటిన ఘటనా స్థలానికి చేరుకుని చిన్నారులను పరామర్శించారు. చిన్నారుల ఆరోగ్య పరిస్థితులపై వైద్యులను అడిగి తెలుసుకున్నారు. చిన్నారుల తల్లిదండ్రులతో కూడా మాట్లాడారు. అంగన్వాడీ భవనం పరిస్థితి, ప్రమాద ఘటనపై ఆరా తీయాలని.. బాధ్యులపై కఠిన చర్యలు తీసుకోవాలని సంబంధిత అధికారులకు ఆదేశించారు. చిన్నారులు అందరూ క్షేమంగా ఉన్న విషయాన్ని వైద్యులు చెప్పారని కలెక్టర్ క్రాంతి స్పష్టం చేశారు. ఇలాంటి ఘటనలు పునరావృతం కాకుండా చూస్తామని తెలిపారు.
ఆస్పత్రిలో చికిత్స పొందుతున్న చిన్నారులను నారాయణఖేడ్ ఎమ్మెల్యే సంజీవ రెడ్డి కూడా పరామర్శించారు. ప్రమాదానికి సంబంధించి వివరాలను అడిగి తెలుసుకున్నారు. అనంతరం మీడియాతో మాట్లాడిన సంజీవ రెడ్డి అంగన్వాడీ భవనం పాతది కావడం వల్లే పెచ్చులూడి పడినట్లుగా తమ దృష్టికి వచ్చిందన్నారు. ఈ ప్రమాదంలో ఎవరికీ పెద్దగా గాయాలు కాలేదని.. చిన్నారులంతా క్షేమంగా ఉన్నారని ఎమ్మెల్యే స్పష్టం చేశారు.
