|
|
by Suryaa Desk | Mon, Dec 30, 2024, 07:17 PM
పుష్ప-2 సినిమా దేశవ్యాప్తంగా సంచలనం సృష్టిస్తోంది. కలెక్షన్ల వర్షంతో బాక్సాఫీస్‌ను షేక్ చేస్తోంది. ఇక్కడా అక్కడా అని కాదు.. అన్ని చోట్లా పుష్ప-2 అస్సలు తగ్గేదేలే అంటూ దూసుకెళ్తోంది. "పుష్ప అంటే నేషనల్ అనుకుంటివా ఇంటర్నేషనల్" అంటూ.. ఇండియాలోనే కాకుండా విదేశాల్లోనూ దుమ్ములేపుతోంది. అయితే.. ఇంత సత్తా చాటిన పుష్ప-2 హీరో అల్లు అర్జున్‌కు సినిమా విజయాన్ని ఆస్వాధించే అవకాశం లేకుండాపోయింది. ప్రీమియర్ రోజు జరిగిన సంధ్య థియేటర్ తొక్కిసలాట ఘటనతో కేసులు, అరెస్టు, బెయిల్, నోటీసులు, విచారణలంటూ బన్నీ.. విజయోత్సవాలకు పూర్తిగా దూరమయ్యారు. ఇదే విషయం తెలంగాణతో పాటు దేశవ్యాప్తంగా రాజకీయ ప్రకంపనలు కూడా సృష్టించిన విషయం తెలిసిందే. ఈ క్రమంలో తెలంగాణ బీజేపీ ఎమ్మెల్యే సంచలన వ్యాఖ్యలు చేయటం ఇప్పుడు సర్వత్రా చర్చనీయాంశంగా మారింది.
సోమవారం (డిసెంబర్ 30న) హైదరాబాద్‌లో బీజేపీ ఎమ్మెల్యే పైడి రాకేష్ రెడ్డి సంచలన వ్యాఖ్యలు చేశారు. అల్లు అర్జున్ రీల్ పుష్ప మాత్రమేనని.. తానే రియల్ పుష్ప.. అంటూ బీజేపీ ఎమ్మెల్యే ఇంట్రెస్టింగ్ కామెంట్స్ చేశారు. తాను లీగల్‌గా ఎర్రచందనం ఎగుమతి చేసినట్లు రాకేష్ రెడ్డి తెలిపారు. ఎర్రచందనం అమ్మినోడు.. కొన్నవాడు కూడా పుష్పనే అంటూ వ్యాఖ్యానించారు.
మరోవైపు.. తెలంగాణ బీజేపీ రాష్ట్ర అధ్యక్ష ఎన్నికపై కూడా రాకేష్ రెడ్డి కీలక వ్యాఖ్యలు చేశారు. సంక్రాంతి పండగ తరువాత తెలంగాణ బీజేపీకి కొత్త అధ్యక్షుడు రానున్నట్టు తెలిపారు. అయితే.. బాహుబలి-1లో అధ్యక్షుడికి మూడు ఏళ్లు సమయం ఇస్తామన్నారు. బాహుబలి పార్ట్-1లో మంచిగా పని చేస్తేనే బాహుబలి పార్ట్-2 లోకి తీసుకుంటామంటూ ఇంట్రెస్టింగ్ కామెంట్ చేశారు. బాహుబలి పార్ట్-1లో ఆశించినట్టుగా పనిచేయకపోతే బాహుబలి పార్ట్-2 లో అధ్యక్షున్ని మార్చేస్తామంటూ కీలక వ్యాఖ్యలు. మరోవైపు.. నల్గొండ, వరంగల్, ఖమ్మం జిల్లాలకు ఎన్నికల సమయంలో తనను ఇంఛార్జీగా నియమించాలని అడుగుతున్నట్లు రాకేష్ రెడ్డి చెప్పుకొచ్చారు. ఆ 3 జిల్లాల్లో 18 మంది ఎమ్మెల్యేలను గెలిపిస్తానని రాకేష్ రెడ్డి తెలిపారు.
మరోవైపు.. అల్లు అర్జున్ కేసు విషయంలో రేవంత్ రెడ్డి సర్కారుపై కేంద్ర మంత్రి బండి సంజయ్ కీలక ఆరోపణలు చేసిన విషయం తెలిసిందే. సంధ్య థియేటర్ ఘటనలో రేవంత్ రెడ్డి అత్యుత్సాహం ప్రదర్శించారని ఆరోపించారు. అల్లు అర్జున్‌కు రేవంత్ రెడ్డికి ఎక్కడో చెడిందని.. అందులో ఇంత రాద్దాంతం చేశారన్నారు. పుష్ప-2 కలెక్షన్లలో రేవంత్ రెడ్డికి 14 వాటా ముట్టిందన్న అనుమానం ఉందని బండి సంజయ్ సంచలన ఆరోపణలు చేయటం ఇప్పుడు చర్చనీయాంశంగా మారాయి. ఇదే సమయంలో రాకేష్ రెడ్డి.. తానే రియల్ పుష్ప అంటూ కామెంట్స్ చేయటం మరోసారి ఆస్తకిర చర్చ నడుస్తోంది.
